慶功 短時間內再去厚福街慶功，跟上次一樣，大部份人都不喝酒，我唯有繼續堅持禾地山傳統，我enzo同埋吹水明三隻老鬼到處強逼人喝，人人都要敬，結果當然是飲到胃痛，但我都認為是值得的，因為去到這一刻，為大家的付出和努力乾杯，醉死又如何!! 最後，在大家面前說了一句真心既說話，亦是當晚放在心裡好久的說話..... 「對不起，我並沒有將優勝演出帶給大家!」 終於有勇氣說出來...... 走到樓下，變成黑漆漆的環境，看著人們準備散去，匯演，似乎真的要完結了，每年最不捨得這一刻，十年的匯演，是否應該來一個終結? 還未及想，眼淚已不自控的湧了出來。 多謝Enfany和阿蒙的安慰，你們永遠是我的乖女! 和吹水明一起行到火車站，聊著說著，不知不覺就十年了，時間真的過得很快，現在，想總結一下這從理工開始的話劇生活 回想 1994年新人之夜，第一次參加理工劇社既SHOW，第一次做後台(ASM) 劇名叫做「鬥」，導演叫Vanessa，女主角好靚女，有d似李嘉欣，叫做Daphne，依家佢係我既好朋友。個時Enzo係做另一套戲既男主角，亦都係同Enzo既第一次碰面。 1995年，上莊，23屆，莊員有Enzo(車頭，依家成為禾地山御用SM)，Belinda(外務副主席，依家全職幫緊「樹寧」做野，勁人一名)，Shirley(唔記得咩職位，禾地山「唔該阿媽」係匯演既優異演員，仲要第一次做演員就拎).....其他有阿濤(去左台灣)，阿峰(依家係poly讀緊phd)，Michelle(唔係依家禾地山果個), Mina，joe(女仔黎架)...好似係咁多啦...唔係好記得，當時我係做外務秘書，好似一封信都無出過.....哈哈!(多謝belinda幫我做晒) 1995年新人之夜，係理工第一次做導演，揾左好拍檔Edwin(禾地山樓梯男主角)做副導，劇名「卡耐成人生指南系列之今晚喝了很多水」，將九粒四條帶入理工劇社，成為之後十幾年劇社既排戲休息好工具(用黎坐)，當時casting，我遇到了Ken(唔該阿媽優異演員)，華dee(兄弟波優異演員)，吹水明(最佳BSM)，當時完show慶功，同老鬼差d打大交，正想拎起玻璃樽爆人個陣，就係呢幾個兄弟，幫我頂晒d酒，幫我小班老鬼; 仲有一班服裝既小妹妹，拎住個碗俾我嘔，嘔到滿潟到佢地手上面.....仍然繼續拎住.....多謝你地! 1996年，由於之前新人之夜太唔開心，名義上雖然仲係23屆莊，但已經同自己講，永遠唔會再幫理工劇社! 所以自己同一個中學既朋友Raymond組織「天丹戲丸」，第一次參加戲劇匯演1996，60隊入面選15隊，竟然順利入選，劇目「神秘的天外來客」，係改篇自「卡耐成人生指南系列之今晚喝了很多水」，繼續揾番Ken, 華Dee, Edwin佢地一班兄弟幫手，Enzo個時係匯演幫緊另一隊老鬼劇團「緣創戲流」做SM。呢次亦都係我人生入面第一次玩匯演，現場觀眾反應一流，笑聲不絕，幾分鐘一次拍掌，自大既我當然以為咁樣就等於「贏」，結果，只得一個演員提名......座談會上面，何偉龍先生話「好亂/好嫰，點解咁樣都會入到決賽.....???」OMG，似乎自己既水平，離匯演勝利仲有好大段路呀! 1997年，參加沙田戲劇節，呢次，我認識左係我話劇生命上面一個好重要既人，佢就係威仔，因為所有人都同我講，我剩係會聽佢講既意見，其他人都會用佢把口黎傳達信息.....(唔好講到我咁自我先得架，我唔係呀 >.<)。我記得係秀梅同我講今屆理工有一個新人好掂，就介紹佢黎俾第一次見威仔係係厚福街，唔知咩SHOW既慶功食緊飯個陣，佢個時個樣仲好乖，依家就變左好壞啦....(十年果然唔係一個短時間)。由KEN, 威仔，華DEE等人幫手既「卡耐成人生指南系列之請勿吐啖」贏得沙田戲劇節1997既優異整體演出，劇本獎同埋演員獎，係我人生入面第一次既公開比賽獎項，當年一齊優勝演出既，係沙田蘇浙公學，導演叫做「邵美君」劇目「各位食飯」，呢次係我第一次認識佢。亦係第一次認識蘇浙，當時大家都唔會估到，之後大家會係匯演十年入面既老對手。 1998年1月，「禾地山」(OURSOUND)成立了，創團成員有EDWIN，威仔同埋一個叫Richard強既人(呢個人吹水程度與吹水明乃伯仲之間，實很難分勝負)，食髓知味情況下，再次玩沙田戲劇節(以為易贏)，劇目「卡耐成人生指南系統之你唔去死」，係一個獨腳啞戲，無對白，由EDWIN做演員，結果決賽都入唔到......個判評話「呢D形體動作起碼每個要練一千次以上架，唔係咁易可以做到」(最憎形體!!!!!!!!!)結果禾地山既第一個SHOW就咁胎死腹中.......年中，以劇目「卡耐成人生指南系列之咪行埋黎」再次參加匯演1998又再次入到決賽喎! 演員係依家係劇場空間做野既「阿泰」同POLY 22屆老鬼PIAN，仲有威仔同埋華DEE 4個，最後，兩個演員提名，同埋拎左個第四.....(演後座談會丁家湘咁講)，又係輸左俾最後一隊「零劇坊」既「小念頭」，個時原來TOBY同阿濤(03年匯演幫禾地山做電話停)係佢地既演員，話劇世界真係好細! 明天待續 | 
